All Posts By

admin

“İctimai TV” komandası “İntellektual kubok”un qalibi oldu

By

Dekabrın 10-da media nümayəndələri arasında 2019-cu il mayın 29-da Bakıda keçiriləcək UEFA Avropa Liqasının final oyununa həsr olunmuş “İntellektual kubok” təşkil olunub. Tədbirdə jurnalistlərlə yanaşı futbol klubların mətbuat xidmətində çalışan əməkdaşlar da iştirak edib.

Bakı Olimpiya Stadionunda keçirilmiş “İntellektual kubok”da 13 komanda mübarizə aparıb. 3 saata yaxın davam edən yarışda iştirakçılara Avropa Liqasının tarixi, maraqlı qarşılaşmalar və tanınmış futbolçularla bağlı müxtəlif suallar ünvanlanıb.

Gərgin mübarizə şəraitində keçən “İntellektual kubok” 13 mövzudan ibarət olub. Hər turda püşkatma nəticəsində təsadüfi seçilmiş 2 komanda bir-birinə qarşı mübarizə aparıb. İki komanda arasında keçirilmiş müsabiqədə daha çox xal toplamış komanda həmin turda qalib elan edilib.

Turnirin sonunda “İctimai Televiziya”nı təmsil edən eyniadlı komanda 34 xalla digər rəqiblərini qabaqlayaraq “İntellektual kubok”da 1-ci yeri tutub. “CBC Sport-2” komandası 33 xalla 2-ci, “Penyarol” isə 31 xalla 3-cü yerə sahib çıxıb. Təşkilatçılar qalib komandaya dəyərli hədiyyələr təqdim ediblər.

Xatırladaq ki, 2019-cu il may ayının 29-da Bakı Olimpiya Stadionunda keçiriləcək UEFA Avropa Liqasının final oyunu ilə əlaqədar silsilə tədbirlərin təşkil olunması planlaşdırılır. Tədbirlər haqqında ətraflı məlumatı və Avropa Liqası ilə bağlı xəbərləri www.finalbaku2019.com saytından əldə edə bilərsiniz.

Avropa Liqasında noyabr ayının qalibi açıqlandı

By

Avropa Liqası qazandırmağa davam edir! Futbolda təxmininə güvənən və noyabr ayı ərzində ən çox xal toplayaraq rəqiblərini qabaqlamağı bacaran iştirakçımız İlqar Heybətov oldu.

İlqar Heybətov kiçik oğlu Əli ilə birlikdə dekabrın 4-də Yerli Əməliyyat Komitəsinin ofisində qonaq olub. Topladığı 53 xalla iştirakçılar cədvəlində birinci sıraya yerləşən qalibimiz təşkilatçılara təşəkkür edib. Daha sonra ona oğlu ilə birlikdə “Qarabağ” futbol klubunun imzalı forması hədiyyə olunub.

Qeyd edək ki, UEFA Avropa Liqasının final oyununun Bakıda keçirilməsi ilə əlaqədar www.finalbaku2019.com saytında işə salınmış xüsusi layihə hələ də davam edir. Siz də hesablarda təxminlərinizə güvənirsinizsə və yarışda iştirak etmək istəyirsinizsə, www.finalbaku2019.com saytında “Hesabı tap” bölməsinə daxil olun, qeydiyyatdan keçin və Avropa Liqasında qazanın!

Oyunun qaydalarına gəlincə, Avropa Liqasının 2018/2019 mövsümü ərzində baş tutacaq oyunların düzgün tapılan nəticələri xal sistemi ilə hesablanır. Bugünədək yarışmada 2000-dən çox iştirakçı qeydiyyatdan keçib. Yarışmanın əsas mükafat fondu 2000 AZN-dir. Bundan əlavə, ümumi xal hesabında ilk yeri tutan hər ayın qalibinə Milli Yığma Komandanın və yerli klubların imzalı forması, Avropa Liqasının rəsmi topu, eləcə də onlarla digər maraqlı hədiyyələr təqdim olunur.

Azərbaycan Respublikasının Prezidenti İlham Əliyev Rober Pireslə görüşüb

By

Prezident İlham Əliyev məşhur futbolçu, fransız Robert Pireslə görüşüb.

Görüş Bakı Ekspo Mərkəzində XXIV Azərbaycan Beynəlxalq Telekommunikasiya, İnnovasiya və Yüksək Texnologiyalar Sərgisi – “Bakutel-2018”-də baş tutub.

Qeyd edək ki, sərgidə, ilk dəfə olaraq, alman alimlərinin ixtirası olan ultra-modern texnologiyası əsasında “RoboKeeper” təqdim olunur. Bu, dünyanın ən sürətli qapıçısı hesab edilir. Hətta bir çox məşhur dünya futbol ulduzları da bu qapıçını məğlub edə bilmir. Robert Pires Prezident İlham Əliyevə Avroliqanın rəsmi topunu təqdim edib.

Pires 1998-ci ildə dünya çempionu, 2000-ci ildə isə Avropa çempionu olub. “Arsenal” komandasının liderlərindən olan Pires, həmçinin İngiltərə kubokunun qalibi və İngiltərə çempionudur. FIFA-nın 2000-ci il reytinqinə görə, o, dünyanın ən yaxşı 100 futbolçusundan biri olub. O, həmçinin gələn il Bakıda keçiriləcək Avroliqa finalının səfiridir.

Rober Pires: “UEFA tərəfindən gözəl seçimdir”

By

“Bakıya ilk səfərim deyil. Daha öncə Fransanın U-20 yığmasının heyətində bura gəlmişəm. Yenidən bura səfər etdiyim üçün xoşbəxtəm. Sevinirəm ki, burada futbolu sevən uşaqlar var. Buna hər zaman diqqət ayırıram”.

Bunu Azərbaycanda səfərdə olan futbol üzrə fransalı dünya və Avropa çempionu Rober Pires deyib. 2019-cu il mayın 29-da Bakı Olimpiya Stadionunda (BOS) keçiriləcək Avropa Liqası turnirinin final oyununa hazırlıq kampaniyası çərçivəsində Bakıya gələn veteran futbolçu yerli jurnalistlərin suallarını da cavablandırıb:

– Bakı Olimpiya Stadionu ilə bağlı fikirləriniz necədir?

– Bakı müasir, gözəl şəhərdir. Stadion da əladır. UEFA tərəfindən gözəl seçimdir. Azarkeşlər üçün burada hər bir şərait var. İstərdim ki, sabiq komandam “Arsenal” burada final oynasın. Stadionu çox bəyəndim.

– Sizcə, Bakı Çempionlar Liqasının finalını da qəbul edə bilər?

– Əlbəttə. Niyə də yox?! Yeni, gözəl stadiondur. Hər şey mümkündür. Azərbaycanlılar da futbolu çox sevirlər. İnanıram ki, ÇL-in finalı burada keçirilə bilər.

– Avropa Liqasının qrup mərhələsində “Qarabağ” – “Arsenal” oyununu izləmisiniz? Qrupda son görüş də bu komandalar arasında Londonda olacaq. Həmin matçı stadiondan canlı izləməyi düşünürsünüz?

– “Qarabağ”ın “Çelsi” və “Arsenal”la ev oyunlarında gördük ki, Azərbaycanda futbolu sevirlər. İndi “Qarabağ” üçün əsas öyrənməkdir. İnanıram ki, “Arsenal”la oyundan da çox şey öyrənəcəklər. Onlar üçün hazırda təcrübə qazanmaq daha vacibdir.

– Bakıda hansı finalı görmək istərdiniz?

– “Arsenal”da uzun illər oynamışam. “Topçular”ın “Çelsi” ilə finalda oynamasını istərdim. Niyə də olmasın?! Böyük derbi olardı. “Arsenal” barədə fikirlərim müsbətdir. Bu kluba azarkeşlik edirəm. Həm də klubun səfiriyəm. Orada hər şey yaxşıdır. İstərdim ki, finala qədər irəliləsinlər.

– Bəs “Arsenal” – “Vilyarreal” finalını necə, arzu edərdiniz? Siz İspaniya klubunun da formasını geyinmisiniz…

– Əlbəttə. “Vilyarreal” da yaxşı komandadır. Səviyyəli oyunçuları var. Hazırda onların finala çıxıb-çıxmayacaqlarını deyə bilmərəm. Komandaya yaxşı məşqçi başçılıq edir. Ancaq yarımfinala qədər gələ biləcəklərini düşünürəm.

– Azərbaycan futbolu üçün nə məsləhət görərdiniz?

– Bir neçə ölkədə işləmişəm. Buna görə də xoşbəxtəm. Azərbaycana kiçik bir məsləhətim var. Özünüzə inanın. Uşaqların arzusu futbolçu olmaqdır. Özünüzə inanaraq, işləyin. Hər şey həyata keçəcək.

– “Qarabağ”ın “Arsenal”la görüşdə şanslarını necə dəyərləndirirsiniz?

– Hər şey “Arsenal”dan asılıdır. Onlar gənc futbolçularla meydana çıxsalar, “Qarabağ” üçün asan olacaq. Ancaq əsas heyətlə oynasalar, komandanızın işi çox çətindir. Yenə də bu, “Qarabağ” üçün yaxşı təcrübədir. “Arsenal”da təqvim çox sıxdır. Ona görə də seçim baş məşqçinin əlindədir.

Rober Pires Bakı Olimpiya Stadionunda festivalı izləyib

By

Azərbaycanda səfərdə olan futbol üzrə fransalı dünya və Avropa çempionu Rober Pires Bakı Olimpiya Stadionunda olub.

Veteran futbolçu AFFA-nın baş katibi Elxan Məmmədovla birgə uşaqlar üçün festivalı izləyib, onlar üçün avtoqraf verib. Pires Bakıda keçiriləcək 2019-cu il Avropa Liqasının səfiri Vəli Qasımovla da görüşüb.

O, daha sonra jurnalistlər üçün brifinq keçirib.

Dünya və Avropa çempionu Bakıya gəlir

By

2019-cu il mayın 29-da Bakı Olimpiya Stadionunda keçiriləcək Avropa Liqası turnirinin final oyununa hazırlıq kampaniyası çərçivəsində dünya və Avropa çempionu, karyerası ərzində bir sıra məşhur klublarda çıxış etmiş fransalı veteran futbolçu Rober Pires Bakıya səfər edəcək.
Dekabrın 4-də Bakı Olimpiya Stadionunda Rober Piresin iştirakı ilə aşağı yaş qruplarından ibarət komandalarda çıxış edən uşaqlar üçün futbol festivalı keçiriləcək. Festival saat 11:00-da başlayacaq.
Sonra fransalı futbolçu Bakı Ekspo Mərkəzində təşkil olunacaq “Bakutel 2018”- 24-cü Azərbaycan Beynəlxalq Telekommunikasiya, İnnovasiya və Yüksək Texnologiyalar Sərgisində Avropa Liqası Final-2019 stendinin təqdimatında iştirak edəcək.

Rəşad Sadıqov üçün tarixi matç

By

Avropa Liqasının qrup mərhələsi çərçivəsində Portuqaliya “Sportinq”i ilə oyun “Qarabağ”ın futbolçusu Rəşad Sadıqov üçün əlamətdar olub.

36 yaşlı kapitan avrokuboklarda 100-cü oyununa çıxıb.

Sadıqov bu göstəriciyə nail olan ilk azərbaycanlı futbolçu kimi tarixə düşüb. Bu münasibətlə UEFA-nın Klub Yarışlarının Təşkili Komitəsinin sədri Mixael Heselşverdt ona 100 nömrəli forma hədiyyə edib.

Qeyd edək ki, qitə miqyaslı turnirlərdə 15-ci mövsümünü keçirən mərkəz müdafiəçisi bu oyuna qədər 99 oyunda 8414 dəqiqə meydanda olmuşdu. Sadıqov bu görüşlərdə 7 qol vurub, 11 sarı və 1 qırmızı vərəqə almışdı.

Sadıqov bu rəqəmə 3 klubda çatıb: “Neftçi”, “Kayserispor” və “Qarabağ”. 2001-ci ildə UEFA Kubokunda “Neftçi”nin “HİT Qoritsa” ilə matçında debüt edən Rəşad “ağ-qaralar”ın heyətində ümumilikdə 18 görüş keçirib. Legioner kimi “Kayserispor”da 5 oyuna çıxan müdafiəçi “Qarabağ”da 77 dəfə oynamaq imkanı qazanıb.

Rəşad Sadıqov 100 matçın 31-ni Çempionlar Liqasında, 59-nu UEFA Kuboku/Avropa Liqasında (6 qol), 10-nu İntertoto Kubokunda (1 qol) keçirib. O, həm də Avropa Liqasında ən çox oyun keçirən azərbaycanlı futbolçudu və bütün Avropa üzrə ilk “50-lik”dədi.

“Qarabağ” – “Sportinq” oyunundan fotolar

By

“Qarabağ” məğlub olub

By

UEFA Avropa Liqası turnirinin qrup mərhələsində “Qarabağ” son ev oyununu keçirib. Bakı Olimpiya Stadionunda Portuqaliyanın “Sportinq” klubu ilə qarşılaşan təmsilçimiz 1:6 hesabı ilə məğlub olub.

UEFA rəsmisi “Qarabağ” – “Sportinq” oyununu izləyəcək

By

UEFA-nın Klub Yarışlarının Təşkili Komitəsinin sədri (Head of UEFA Club Competitions) Mixael Heselşverdt Bakıya gəlib.

Almaniyalı funksioner “Qarabağ”ın Portuqaliya “Sportinq”i ilə keçirəcəyi Avropa Liqasının V tur matçını izləyəcək. Bakı Olimpiya Stadionunda keçiriləcək görüş saat 21:55-də başlanacaq.

Qeyd edək ki, Mixael Heselşverdt avrokubokların püşkatmasını həyata keçirir.